بلياتشو

وشى كله الوان جميلة .. مفرحه تشوفنى تقول الحق ده بلياتشو تعالى نتفرج عليه ونشوف العيبه وبكشه !!

لكن ...لو حاولوا بس يبصوا جوايا ولو بصه هيلقوا الوان الحزن والوحده

كلها مرسومه ومنقوشه جوايا ..لو شفتها هتقول معقول فى بلياتشو الزمن كده هلكوا ونتشوا وخلى كل الناس تفتكروا بس مجرد بلياتشو !!

وكأن ممنوع عليا أبكى.. أصرخ .. أحزن ..ومكتوب عليا بس أفرح كل الناس .. اديهم سعاده وفرح وهانا .. ولما أكون لوحدى أكون أنا

وحيد .. شريد .. تايه .. مش عارف عايش ليه فى الدنيا

اللى هربت منها وجريت على حياة السيرك .. كنت فاكره هيسلينى

هينسينى ..هيجمد قلبى ويخلينى أفرح بحياتى مع كل الناس

لحد ما عرفت انى بلياتشو خايب بضحك وبفرح كل الناس لكن

مع قلبى وروحى بلياتشو فاشل لا بعرف اضحكهم ولا اسعدهم

وبنيمهم بيبكوا ليالى.. ومع كل سهرة الضحك بيكون حواليا

صوته عالى .. ومن جوايا صوت صرخه عاليه بتجرح جوه قلبى الغالى

وبتقولى امتى تكون بلياتشو ليا تفرحنى وتنسينى همومى فى لياليا

ده مهما روحت ومهما جيت أنا قلبك أقرب ما ليك من كل الناس ديا


فقررت أكون بلياتشو بجد أه بحب أفرح كل الناس وشوف واسمع ضحكتهم الحلوة .. لكن من حق قلبى عليا إنى أحس إنه هو كمان عايش وبيضحك وسعيد معايا .. وضحكته لازم توصل لسابع سما

ووقتها هعرف إنى فعلا أجمل بلياتشو ..وحياتى كلها ألوان من بره وجوه

ووقتها هطير من الفرح لما كل الناس تجرى عليا وتقول ده فعلا بلياتشو