مش عارفة أحب !

مش عارفة أحب !
ده كان عنوان موضوع كتبته فى منتدى من المنتديات من فترة ، وملخص الموضوع إنى قولت أنا حبيت واحد من مدة . وطبعا أنا قصدت بأنى حبيته مش المعنى اللى كتير من الناس ممكن يظنه , يعنى زى اللى بيحصل الأيام دى لكن أنا حبيته حب من نوع تانى حب ساذج أو بمعنى أصح حب برىء أوى لكن يعنى تقدروا تقولوا كده إن مكنش فى نصيب ومشكلتى اللى أنا كنت بعرضها فى الموضوع هيا إنى مش عارفة أحب أى حد بعده مع أنى بقابل شخصيات كتير محترمة وجذابة وتلفت نظر أى حد لكن عمرى ما حسيت أنى معجبة بأى حد , يعنى زى ما تقولوا كده أن الشعور اللى جانى أول مرة معدش يتكرر تانى أبدا وكأنها فرصه مبتجيش للإنسان غير مرة واحدة بس يأما يستغلها ياأما هتضيع وعمرها ما هترجع .
المهم بعد ما كتبت الموضوع ده فوجئت بمجموعة من الردود كلها فيها عتاب ولوم وغلط فيا ونصيحة ليا إنى أقرب من ربنا واستغفره ومكررش اللى حصل ده مرة تانيه واعتبروا دى جرأة منى أنى أصرح بحاجة زى دى وكأنى ارتكبت ذنب أو عملت جريمة .
ودلوقتى أنا عايزه أسألكم ليه الناس ديما بتصدر أحكام على أشخاص ميعرفهمش أو متعملوش معاهم يعنى لية ديما الناس بتسىء الظن فى اللى حوليها يا ترى العيب فيا أنا ولا دى طبيعة بشر .
وأنا كده خلصت كلامى ومستنية أعرف وجهة نظركم فى الموضوع مع احترامى لجميع الآراء .[right]

بصراحة انا محترمة صراحتك جدا يا يويو
وعايزة اقولك ان العيب مش فيكى ولا حاجه احنا كلنا بشر وده من طيبة قلبك انك تقولى كده وده مش غلط انك عايزة تعرفى رأى الناس ومش كل الناس بتسئ الظن ولا حاجه دول جزء من الناس اللى رضوا عليكى مش كلهم يعنى ف ناس كتير طيبة
وهما قالولك كده لانهم مش يعرفوكى شخصيا وميعرفوش انك قصدك شخص ترتبطى بيه يعنى خطيبك فاغذريهم لانك موضحتيش انتى قصدك ايه هما يفتكروا الحب اللى بنشوفه اليومين دول
وبالنسبة لموضوعك نفسه فانا بقولك ده شئ عادى ومتستعجليش نصيبك هيجيلك ومش لازم علشان الشخص فيه كل المواصفات الكويسه انك تحبيه الحب ده بيجى من عند ربناوان شاء الله ربنا يوعدك بشخص كويس زيك وفيه كل المواصفات اللى عيزاها
اسفه على الاطاله وشكرا يا يويو

اولا يا يويا انا سعيدة انك معانا ف المنتدى
ثانيا بالنسبة انك كنتى بتحبى شخص ومش قادرة تنسيه
ده حاجه طبيعية طالما كنتى بتحبيه فعلا
وصعب انك تحبى حد تانى نفس الحب اللى كنتى بتحبيهوله
لان الشخص ده بيبقى لسه ليه حاجات عايشه جواكى
ممكن تتنسى مع الايام وممكن لا
الحب احلى حاجه ف الدنيا وكتير اوى منا ناس بتتمنى انها تعيشه
وانت عشتى اجمل احساس مع الشخص ده ولسبب ما محصلش نصيب
وزى ما سهر قالت ان الحب ده بيجى كده من ربنا مهما كان شخص ده حلو اوى
محدش عارف نصيبه فين ممكن نصيبك انك تعيشى للشخص اللى كنتى بتحبيه وممكن يرجه تانى
وممكن تقابلى شخص يخليكى تنسى الحب الاولانى
محدش يعرف نصيبه فين
وادى لنفسك فرصة تانية
وقولى الحمدلله على كل حاجه

أما موضوع ان الناس هجمتك عشان صرحتى بحاجه زى ده
فأنا محترمة جرأتك جدا بس هو كل الحكاية ان الناس دول فعلا ميعرفكيش
وكل واحد ليه وجهة نظر المهم انتى شايفة ايه ده الاهم
لان كل واحد بيقول رأيه من وجهة نظره هوه
لكن انتى اللى عايشه ف الوضع ده
وده طبيعة بشر الغالب فيها بيسئ الظن وبعدين يرجع يحسن الظن
وسورى على الاطالة
ويارب اكون افدتك